Former Councilor Plaridel Nava ginkasuhan sa Ombudsman si Cong. Julienne Baronda may kaangtanan sa unexplained wealth sang kongresista
ILOILO CITY—Las-11 kaina sang aga, nagpadulong sa Office of the Ombudsman—Visayas si former City Councilor Plaridel Nava agud mag-file sang complaint batok kay Cong. Julienne Baronda may kaangtanan sa iya nga unexplained wealth.
Sa 25-pages nga affidavit of complaint ni Nava, ginakuwestiyon niya ang “unexplained wealth” sa anum ka tuig pa lang nga pagkakongresista ni Baronda kon diin nagdamo suno kay Nava ang mga propedad kag mga kagamitan sang kongresista lakip na ang mga personal items.
Sa amo nga affidavit, ginlista ni Nava ang 27 ka nagkalain-lain nga “luxurious properties, high-end merchandises and extravagant items” ni Baronda nga ginalakipan sang condominium kag housing units sa Metro Manila kag Quezon City, bullet proof nga salakyan kag apat ka iban pa, sing-sing, aritos, kulintas, relo, sapatos, bag, sandals, paha, kag iban pa.
Magluwas diri ginpabutyag man ni Nava sa affidavit nga mahilig si Cong. Baronda magbiyahe sa Europe, North America, kag Asia upod ang iya pamilya.
Kuwestiyonable ini suno kay Nava tungod indi ini masarangan sang iya lang nga sweldo bilang kongresista, kag sa iya pagkahibalo wala man sang negosyo ang kongresista.
Gin-request ni Nava ang Ombudsman nga mag-issue sang subpoena sa secretary sang House of Representative agud magpaguwa sang kopya sang Statement of Assets, Liabilities, and Net Worth (SALN) ni Cong. Baronda halin sang 2019 tubtob 2025.
Sa amo man nga request ginapa-subpoena man ni Nava ang Bureau of Internal Revenue nga magpaguwa sang Income Tax Return (ITR) sang kongresista halin 2010 tubtob 2025. — Aksyon Marvin Malificiar
