Hinablos patay sang ginbuno sang iya tiyo sa Barotac Nuevo

Patay ang hinablos sang ginbuno sang iya tiyo sa Barangay Tabucan, Barotac Nuevo las-6 kaina sang aga.

Suno kay Police Captain Cedric Cruz, hepe sang Barotac Nuevo Municipal Police Station, may nag-report sa ila nga nakakita sa lalaki nga nagahapa kag patay na.

Nagguwa sa imbestigasyon sang police nga naga-inum-inum ang biktima nga si alyas Rico kag iya tiyo nga si alyas Jun-jun, residente sang Ivisan, Capiz, antes ang insidente.

Sa alegasyon sang tiyo, ginsumbag siya sang iya hinablos gani nagbalos siya kag ginbuno suno sa police.

Sa pagpanumdom nga nakadalagan pa pakadto sa ospital ang iya hinablos, nagbalik si Jun-jun sa ila ginadayunan nga yara man sa ginapahimuan hollow blocks sa diin sila nagatrabaho.

May witness naman nga nakatudlo nga si Jun-jun ang ulihi nga upod ni Rico gani ginkadtuan sang police kag gin-usisa.

Nakaagum sang tatlo ka pilas sang pagkabuno sa tiyan si Rico samtang na-recover ang kutsilyo nga gingamit sa krimen. — Aksyon Maria Kayla Tingzon