Suspected shabu nga nasulod sa wallet kag nakit-an sa sulod sang taxi gin-turnover sa Aksyon Radyo Iloilo
ILOILO CITY — Gin-turnover sa Aksyon Radyo Iloilo sang taxi driver ang suspected shabu nga iya nakit-an sa backseat sang ginamaneho nga unit kaina sang kaagahon.
Suno kay alyas Toto, nagapaninlo siya sa backseat sang taxi sang nakita niya ang itum nga wallet sa salog sang salakyan// Sang ginbuksan, may sulod ini nga sachet sang suspected shabu, foil kag gunting, pero wala sang ID,
Agud indi masuspetsuhan, nagsaka sa estasyunan si Toto agud i-turnover ang illegal drugs.
Ginpahayag ni Toto nga antes siya nagpahuway kagab-i, may gindul-ong pa siya nga pasahero sa ospital kag may yara man sang nagsakay pa gid nga iban nga pasahero gani wala siya sang ideya kon sin-o sa ila ang nakabilin sang wallet.
Gin-turnover naman sang estasyunan sa Mandurriao police ang gin-turnover nga suspected shabu ni Toto.
Suno kay Police Captain Val Cambel, hepe sang Police Station 10 sa Mandurriao, ginabanta nagabug-at sang 2 grams ang suspected shabu nga may standard drug price nga P13, 600.
