9-ka tuig nga bata nga babaye, ginpahayag nga na-trauma matapos gintampa sang iloy sang 4-ka tuig nga bata nga iya aksidente nga natiklod samtang nagahampang

Iloilo City — Ginreklamo sang amay sang 9 ka tuig nga bata nga babaye ang isa ka ginang nga gintudlo sini nagtampa sa iya anak sa plaza sang Mandurriao.

Suno kay alyas Bonjo, natabu ang insidente sang Pebrero 15 pa.

Base sa panaysayon sang mga kaupdanan ni Karen, makatatlo ka beses gid nga gintampa ini sang ginang.

Ginpahayag aksidente nga natiklod ni Karen ang 4 ka tuig nga anak sang suspek samtang nagahampang sila sa slide sa plaza.

Na-trauma gid si Karen suno kay Bonjo kag indi magsulod sa eskwelahan kon wala sang upod sa kahadluk nga balikan ini sang ginang.

Ginpabutyag suno kay Bonjo sang mga nakasaksi sa natabu nga matapos gintampa, ginpahug pa sang ginang si Karen.

Naka-istoryahanay na ang asawa ni Bonjo kag ang suspek.

Suno kay Bonjo, naghambal ang suspek sa iya asawa nga bayaran lang sini kon may nagasto sa pagpabulong sa ila anak kag nagpamahug pa suno sa iya nga balikan sila sang kaso bangud sa natabu sa iya 4 ka tuig nga bata kon mag-demanda ang pamilya sang tagreklamo. (JoMaque)