Branch Manager sang Land Bank of the Philippines sa Sara, Nasapwan nga Patay na

Sara, Iloilo — Nasapwan nga patay na sa kuwarto sang ginatineran nga mini-hotel sang Northern Iloilo Polytechnic State College ukon NIPSC sa Sara ang branch manager sang Land Bank of the Philippines kaina sang aga.

Gin-identify ni Senior Inspector Ronie Brillo sang Sara Police Station, ang bangkay kay Lester Gonsalves, 44-anyos sang Pavia.

Wala sang patimaan nga ginpatay ukon ginkawatan si Gonsalves bangud kompleto ang mga pagkabutang sini sa sulod sang iya kuwarto kag wala man sang may nakita nga mga pilas sa iya lawas.

Ginapatihan ni Brillo nga balatian ang ginkamatay ni Gonsalves bangud may nakakita sa iya kahapon nga nagpa-check-up sa doctor.

Apang irekomendar gihapon ni Brillo sa pamilya sang lalaki nga ipa-autopsy ang bangkay agud matumod kun may foul play ukon wala sa iya kamatayon.

Si Gonsalves ang isa pa lang ka bulan nga nagpangalagad bilang branch manager sang Land Bank sa Sara suno kay Brillo. (JoMaque)