(UPDATE) Nagalapta nga impormasyon nga nadakpan ang mga employers ni Joanna Demafelis, wala sang kamatuoran suno sa OWWA

Iloilo City–Wala sang kamatuoran ang impormasyon nga naglapta sa social media nga nadakpan na ang mga employers ni Joanna Demafelis, ang Ilongga OFW nga nasapwan sa sulod sang freezer sa Kuwait.

Suno kay Mr. Jack Arroyo, spokesman sang Overseas Workers Welfare Administration 6, gilayon nila gin-verify ang amo nga impormasyon pero nagguwa nga wala sang kamatuoran nga nadakpan sanday Nader Issam Assaf, Lebanese kag ang asawa nga Syrian nga si Mona Hassoun.

Ginasiguro suno sa iya sang OWWA 6 nga sa ila mismo maghalin ang impormasyon nga ginahatag sa pamilya Demafelis kag indi sa iban nga sources.

Paathag ni Arroyo, indi makabig nga opisyal ang amo nga impormasyon bangud wala naghalin sa OWWA, DOLE ukon POEA kag wala man naghalin sa news websites. Wala suno sa iya sa pagsulundan sang OWWA nga mag-post sang mga kasubong nga impormasyon kag litrato nga wala sang clearance sang pamilya sang biktima.

Nangin viral ang post sa social media kag bisan mga local media ang nag-share sang amo nga impormasyon pero ginpa-athag sang OWWA 6 nga indi ini matuod. (AGB)