Congressman Jerry Treñas, ginpostpone ang plano nga pagfile sang COC sa Oktubre 11 agud indi magdungan kay Mayor Joe Espinosa

ILOILO CITY — Indi gusto ni Congressman Jerry Treñas nga magdungan sila ni Mayor Joe Espinosa sa pagfile sang Certificate of Candidacy sa Oktubre 11.

Ini ang rason kun nga-a isulon ni Treñas ang pag file sang COC apang wala pa sang petsa kun san-o.

Suno sa kongresista, may misa man kag parada ang ila grupo antes ang pag file sang COC.

Nagapabilin nga 10 ang kandidato sa pagkakonsehal sa idalom ni Trenas.

Samtang, gin-akusaran ni Treñas si Espinosa nga nagapamigos sa mga job hires.

Suno sa kongresista, nakabaton siya sang impormasyon nga gin-require ang mga job hires nga magdala sang napulo ka mga tawo para mag-upod sa parada sang ila linyada antes magfile sang COC.

Ginpahayag ni Treñas nga base sa impormasyon, kun indi makadala sang napulo ka tawo, indi na pag i-renew ang kontrata sang job hires.

Base sa pagpangusisa sang Aksyon Radyo sa pila sa mga job hires, wala sila sang ideya nahanungod sa pag-require sa ila nga magdala sang napulo ka mga tawo para mag upod sa parada. (JoMaque)