MGA BIKTIMA SANG SUNOG SA JARO, HALUSON INDI NA MAKILALA

Halos indi na makilala ang mga bangkay sang maglola nga ginapatihan nalakip sa nasunog nila nga balay sa MH Del Pilar, Jaro pasado alas tres kaina sang kaagahon.

Suno kay Fire Chief Inspector Christopher Regencia, City Fire Marshal, naghalin ang kalayo sa ground floor sang balay rason na-trap sa second floor ang maglola.

Nagapati si Regencia nga nasapwan nga mga bangkay iya ni Natividad Fanunciano, 80-anyos kag mga apo niya nga sanday Ivan Apongol, 5 ka tuig kag Iman Apongol, 6 ka tuig .

Nakita sang mga bombero ang lawas sang mga biktima nga nagakup-anay kag upos gid sa sunog.

Totally-gutted man ang balay nanday Natividad Fanunciano, Rolando Arguilles kag Zenaida Ruis samtang partially-damaged ang balay ni Nida Jeruta kag Milagros Sibag.

Nagapadayon ang imbestigasyon sang Bureau of Fire Protection sa sunog nga nagtupok sang lima ka mga balay sa MH del pilar jaro pasado las tres kaina sang kaagahon.

Pero sa inisyal nga pagpangusisa ginpahayag ni Fire Chief Inspector Christopher Regencia, City Fire Marshal, nga posible naghalin ang kalayo sa ginsindihan nga kandila ukon kuryente.

Nagsugod ang kalayo sa balay ni Natividad Fanunciano.

Upod sini sa balay ang duha niya ka mga apo.

May nakit-an nga mga bangkay sa nasunog nga balay kag ginapatihan nga ini iya ni Fanunciano kag sang duha niya ka apo.

Ginabanta sa 400 mil pesos ang kahalitan sang sunog.