Rason sang PDEA nga naguba ang ila photocopying machine gani wala mahingagaw pasaka ang kaso batuk sa apat ka miembro sang pamilya Regalado nga nadakpan sa raid, gintawag nga ‘lousy’ ni Councilor Joshua Alim

Iloilo City— Gintawag ni Councilor Joshua Alim nga ‘lousy’ nga rason ang pahayag sang Philippine Drug Enforcement Agency nga naguba ang photocopying machine sang ahensya gani wala mahingagaw nga mapasakaan sang kaso ang apat ka miembro sang pamilya Regalado nga na-aresto sa raid sa Sambag, Jaro sang Disyembre 13.

Sa amu nga raid, nakuhaan sang masobra tunga sa milyon ka pesos nga balor sang shabu ang mag-utod nga Leo, Cyril kag Arnulfo Regalado, mga utod ni late Meriam Regalado-Odicta nga asawa ni the late PDEA-identified drug group leader Melvin Odicta.

Subject sa raid ang asawani Arnulfo nga si Nilda nga nagapanginwala nga nagabaligya siya sang illegal drugs.

Suno kay Alim, chairman sang Committee on Police Matters sa City Council, nalipay pa siya sang ginhambal sang PDEA nga may nadakpan sa raid apang nakibot sang nahibaluan nga ginbuy-an ang apat bangud nag-lapse ang reglementary period kagab-i, Disyembre 14.

Ginpahibalo ni Alim nga sa pagbalik sang session sang konseho, ma-deliver siya sang privilege speech agud imbestigaran ang natabu.

Ipadala suno sa iya ang kopya sang imbestigasyon sa PDEA central office kag kay Presidente Rodrigo Duterte. (AGB)