Mga kandidato sa Iloilo City para sa midterm elections, gin-imbitar sang ICPO Spox nga mag-upod sa Unity Walk and Peace Covenant Signing

Iloilo City— Gina-imbitar sang Iloilo City Police Office ang mga kandidato sa 2019 Midterm Elections nga magpasakup sa Unity Walk kag Peace Covenant Signing buwas, Enero 13.

Suno kay Police Senior Inspector Shella Mae Sangrines, spokesperson sang ICPO, ang Unity Walk kag Peace Covenant Signing nga preparasyon para sa midterm elections ang kabahin sang aktibidad para sa pagsugod sang Nationwide Comelec Election Gun Ban buwas sa kaagahon kag magalawig tubtub Hunyo 12.

Ginpahayag ni Sangrines nga antes ang Unity Walk, may hiwaton nga misa las 6:30 buwas sa aga.

Ang ruta sang aktibidad magahalin sa Provincial Capitol Ground kag magatapos sa bag-o nga grandstand sa Muelle Loney area.

Pasakupan ini sang nagkalain-lain nga ahensya kag government offices pareho sang Comelec, DEP-ED, DOJ, AFP, NBI kag BFP kag kaupod man ang
PPCRV.

Maga-upod man ang mga force multipliers kag miembro sang academe. (AGB/JGM)