Naka-maskara nga mga lalaki sa kontrobersiyal nga pag-raid sa balay sang pamilya Regalado, posible mga personnel sang PDEA 6 suno kay PRO 6 Director John Bulalacao

Iloilo City — Posible personnel sang Philippine Drug Enforcement Agency ukon PDEA 6 ang mga lalaki nga nakamaskara sa kontrobersiyal nga pag-raid sa balay sang pamilya Regalado sang Disyembre 13, 2018.

Ini suno kay Police Regional Office 6 Director Chief Superintendent John Bulalacao.

Suno kay Bulalacao, ginpanginwala sang mga anay personnel sang Regional Drug Enforcement Unit ilabi sang anay team leader nila nga si Police Senior Inspector Kennith Bermejo Jr ang ila kaangtanan sa ginpahayag pagtanum sang ebidensiya, pagliso sang CCTV camera kag pagkuha sang personal nga mga gamit sang pamilya Regalado.

Nanindugan ang mga anay RDEU personnel suno kay Bulalacao nga wala sila nakasulod sa balay ni Mrs. Candelaria Regalado, ugangan ni the late PDEA-identified drug group leader Melvin Odicta, sa pagserbe sang search warrant.

Gin-ako naman sang mga anay RDEU personnel nga nakita nila ang mga lalaki nga nakamaskara apang ginpahayag indi nila kilala.

Wala pa nakahatag sang pahayag ang PDEA 6 angut sini.

‘IT IS DELAYED’

Gin-ako naman ni Bulalacao nga nagaka-delay na ang resulta sang imbestigasyon sa kontrobersiyal nga pag-raid sa balay sang pamilya Regalado.

Suno sa opisyal, magluwas nga indi pa certified true copy ang ginhatag nga kopya sang CCTV camera footage sang pamilya Regalado angut sa insidente, wala pa man nakahatag sang pahayag ang mga anay personnel sang PDEA 6 nga may kaangtanan.

Nagmandu na si Bulalacao sa Regional Investigation and Detection Management Division nga magcoordinate sa PDEA 6 kag kampo sang pamilya Regalado para mas mapabakod kag mapadasig ang imbestigasyon. (JoMaque/AT)