2 suspects nga ginpahayag naghold-up sa masahista sa City Proper, nadakpan sang pulis sa hot pursuit operation

Iloilo City – Yara na sa custody sang Police Station 1 ang duha ka suspects nga ginpahayag naghold-up sa masahista sa Aurora Subdivision, Jalandoni Street, City Proper kaina sang kaagahon, Pebrero 11.

Suno kay PO3 Espinosa sang Police Station 1, nadakpan sa hot pursuit operation sanday Raja Amiel Sueta, 18 anyos sang Jereos, Lapaz kag kaupod nga menor-de-edad.

Base sa ginpa-blotter sang masahista nga si Alyas Niña, 26 anyos, nagalakat siya sang nakita ang apat ka lalaki nga nagasakay sa duha ka motorsiklo. Nagpanaug suno sa iya ang duha ka lalaki kag natabu ang ginpahayag pagpang-hold-up.

May natabu nga pag-agaway suno sa iya kag gintayaan siya sang mataliwis nga bagay. Nataban sang mga suspects ang iya cellphone nga nagabalor sang P10,000.

Nakuha naman sang babaye sa ginluntaran sang insidente ang pellet gun kag kutsilyo kag gindala niya sa police station sang siya ang nagpa-blotter.

Sang ginpakita sa biktima ang duha ka suspects kag ila motorsiklo subong nga gab-i, hinali lang siya nga nalipong.

Ginatinguhaan pa sang Aksyon Radyo nga kuhaan sang pahayag ang mga suspetsado. (JoMaque)