Tiyo sa Lapaz, ginreklamo nga gintuyo himuslan ang iya 10-tuig nga hinablos

Iloilo City – Preso gihapon ang 42 anyos nga tiyo nga ginreklamo nga tuyo maghimulos sa iya 10 ka tuig nga hinablos nga babaye sa isa ka barangay sa Lapaz sang Dominggo, Marso 24, mga alas-11:30 sang gab-i.

Suno kay alyas Inday, naghulid sa iya ang iya hubog nga tiyo nga si alyas Mokong, tumandok sang Kanlaon, Negros Oriental. Tuman ka pigado sang sitwasyon sang pamilya bangud ang kalan-an, amo man ang ginatulugan kon gab-i. (Trisikad driver ang amay ni Inday samtang naga-obra bilang manug-ihaw sang manok sa Leganes ang iya iloy).

2017 suno kay Inday sang nagtenir sa ila balay si Mokong.

Nagsugod suno sa dalagita ang paghimo sa iya sang kabastusan sang Pebrero 3 subong nga tuig pero wala siya nagapanugid bangud ginapahug siya sang iya tiyo nga patyon. Wala nakabatyag ang amay ni Inday sang Dominggo bangud hubog samtang ara sa ila ulubrahan ang iloy kag kamagulangan nga bata.

Pero nakita ni alyas Toto, 16 anyos nga pakaisa ni Inday, nga naghulid ang ila tiyo sa tagreklamo kag gin-ubahan ini sang shorts. Nagkuha si Toto sang botelya kag ginlampusan ang iya tiyo gani nagbugtaw ang tanan kag ginpadakup si Mokong.

‘INDI MATUOD’
Nanginwala si Mokong sa akusasyon ni Inday. Suno sa iya, masami nga nagapangihi sa ginahigdaan si Inday gani nagasaylo siya sang hiligdaan.

Suno pa kay Mokong, gina-angga niya lang ang hinablos kag wala sang malisya ang iya pagpalapit sa dalagita. Nag-sorry naman si Mokong kay Inday kag sa iya ginikanan.

INDI NA MAGPASAKA KASO
Wala na sang plano si alyas Nene, iloy ni Inday, nga mag-file sang kaso batuk sa iya bayaw matapos nagnegatibo nga ginhimuslan ang resulta sang medical test sa iya bata. Pero ila na lang nga papuliun sa Negros si Mokong. (JoMaque)