Klase halin pre-school tubtob Senior High School sa syudad, ginsuspender subong nga adlaw bangud sang pag-ulan

By: Aine Grace Bravo | July 1, 2019, 6:30PM 

via Aksyon Jeremae Ventar/BBB      

Iloilo City — Ginsuspender ni Mayor Jerry Treñas ang klase halin pre-school tubtob Senior High School bangud sang mabaskug nga pag-ulan subong nga adlaw.

Una nga gin-anunsyar sang alkalde ang suspension sang klase halin pre-school tubtob Grade 6 kaina sang aga.

Pero nagdesisyon siya nga kanselahon man ang klase sa high schools kag Senior High Schools pagka-hapon bangud wala nagahulaw ang ulan.

Ginbasehan man ni Treñas sa suspension ang data sang PAGASA nga posible ma-experyensyahan pa ang kasarangan tubtob mabaskug nga pag-ulan bangud sang gal-um sa south sang Antique.

Ginmaduan ni Treñas ang City Disaster Risk Reduction and Management Council nga i-monitor ang weather updates samtang naka-standby ang response clusters kon may emerhensya.

Pila ka banwa man sa probinsya ang nag-deklarar sang suspension sang klase subong nga adlaw.