Ruta sang tricycle, CLUP, indi requirements agud maaprobahan ang Local Public Transport Route Plan — PSTMO
ILOILO CITY — Gin-athag ni Public Safety and Transportation Management Office (PSTMO) Head Jeck Conlu nga wala nalakip sa mga requirements ang ruta sang mga tricycle sa Iloilo City para sa Local Public Transport Route Plan (LPTRP) sang siyudad.
Magluwas diri, indi man requirement ang Comprehensive Land Use Plan (CLUP) agud ma-aprubahan ang LPTRP.
Suno kay Conlu, ginsuhestyun na lang sang LTFRB nga ilakip sa LPTRP ang ruta sang tricyle bangud nadihon naman ini.
Dugang pa ni Conlu, “Indi na ya requirement ang CLUP (Comprehensive Land Use Plan) para ma-approve ang Local Public Transport Route Plan.
Buot silingon, natabuan lang subong nga nag-update kita sang aton CLUP that’s why nga i-incorporate na lang naton [sa LPTRP] kay dira magabutang sang direksyon sa development sang aton nga siyudad.
”Una na ginpahayag ni Iloilo City Councilor Romel Duron, chairman sang Committee on Transportation sa City Council nga ginahulat pa nga ma-aprubahan ang CLUP nga amo ang pagabasehan sa pagdihon sang LPTRP.
Nagpaathag man si Conlu sa pagbalik sang Department of Transportation (DOTr) sang LPTRP sang siyudad nga una na ginsumiter sang siyudad.
Suno sa iya, “Ang kulang sa ‘to, amo lang ang pagplastar sang justification sa mga overlapping naton nga mga ruta. So, ano ang mga justifications? Amo ini ang mga numbers. Ano ini nga numbers? Data ini nga dapat naga-conduct kita sang house-to-house survey kag sang boarding and alighting survey. Ina bala kun pila ka pasahero sa ini nga ruta ang nagasaka-panaug. Surveyhon ina para mahibaluan kun ano ka damo ang mga pasahero nga nagasaka-panaug sa amo ni nga ruta.”“Wala na gid kita sang major [ukon] daku nga problema sa aton nga Local Public Transport Route Plan. Ang kulang sina data, because last year wala kita ka-conduct survey because indi pwede, because limited ang movement of people,” dugang pa ni Conlu.
Base sa DILG-DOTr Joint Memorandum Circular No. 1 series of 2017 nga gin-isyu sang Hunyo 19, 2017, ginmanduan ang mga local government units nga magpatuman sang moratorium sa pagbaton sang applications/petitions sang tricycle franchises samtang wala pa ma-aprubahan ang LPTRP sang LGU. –via Firingline
