Lalaki, nagpangbuno sang mga pasahero sa sulod sang Ceres bus sa Ajuy, Iloilo; Suspek, na-aresto

ILOILO — Gin-custody sa Ajuy Police Station ang lalaki nga nagpangbuno sang mga pasahero sa sulod sang Ceres bus las 9:20 kaina sang aga.

Suno kay Police Corporal Aaron Animas, imbestigador sang Ajuy MPS, pakadto kuntani sa siyudad sang Iloilo ang bus sang pag-abot sa Mangorocoro, Ajuy, gulpi lang ginbuno sang suspek nga si Rodel Ilagan, 41, sang Cubay, Jaro ang mag-live in partner nga Mea Panes, 24, kag Jeramil Perez, 31, sang Estancia, Iloilo.

Dala sang mag-live in partner ang ila tatlo ka tuig nga bata nga lalaki.

Una nga ginbuno ni Ilagan si Jeramel nga naigo sa wala nga parte sang dughan kag natumba.

Sunod nga ginbuno sang suspek si Mea nga naigo sa tuo nga parte sang dughan, tuo nga parte sang hawak kag wala nga kamot. Nadaplisan naman sang kutsilyo ang likod sang tatlo ka tuig nga bata.

Ginpahayag ni PCpl Animas nga may pasahero nga lalaki nga nagbulig sa mga biktima kag ginsumbag ang suspek nga naigo sa apipingig kag gintapi ang iya kutsilyo rason nga nagtabog.

Ginpulot naman ni Jeramel ang kutsilyo kag nagbalos buno sa suspek nga naigo sa tuo nga kamot.

Nakapondo ang bus suno kay Animas kag nagpalanaug ang mga pasahero lakip na ang suspek.

Natabuan naman nga may naglabay nga mobile patrol kag nadakpan ang suspetsado.

Suno kay Animas, indi nila ma-istorya si Ilagan bangud nga naga-waras kag nagahambal nga “Patya niyo na lang ‘ko.”

Nahibaluan ang identity sang suspect base sa na-recover nga ID sa iya bag. Ginahibalo pa sang Ajuy police kun ano ang trabaho ni Ilagan.

Gindala sa ospital ang mga biktima kag estable na ang kondisyon suno kay Animas.