German national, patay sang ginsulod kag gintiro sa iya balay sa San Enrique
ILOILO — Dead-on-arrival sa ospital ang German national nga si Otto Wolfgang Alexander Knorr sang ginsulod kag gintiro sa iya balay sa Brgy. Camiri, San Enrique kagab-i, Hunyo 8.
Ini ang ginkumpirmar ni PSSg Elmer P. Lamera sang San Enrique Municipal Police Station. Wala pa sang identity ang pulis sa suspect nga gilayon nagpalagyo matapos ang insidente sakay sa motorsiklo.
Ginhingagaw naman dala sa ospital ang biktima pero napatay bangud sang pilas sa ulo.
Na-recover sa crime scene duha (2) ka fired cartridge case sang .9mm caliber; isa (1) ka fired cartridge case sang .40 caliber; kag isa (1) kag slug.
MAY NEGOSYO NGA PAUTANG
May negosyo nga pautang ang German national nga gintiro-patay sa sulod sang iya balay.
Suno ini kay Camiri Punong Barangay Domingo Austria. Ginpahayag sang kapitan nga sa Bacolod City gid nakapangasawa ang German national pero nakabakal siya sang duta sa San Enrique kag mga 10 ka tuig na nga nag-estar sa lugar.
Wala sang kaupod ang biktima sa iya balay sang natabo ang krimen bangud nagpauli sa Bacolod City ang iya asawa dugang pa sang kapitan.
Ginpahayag pa sang kapitan nga wala sang kaaway sa barangay ang biktima. Posible nga kilala niya man ang nagpatay sa iya bangud wala siya nagapasulod sang tawo nga indi niya kilala sa iya nga balay.
Wala pa sang ideya si Punong Barangay Austria sa motibo sa krimen. Wala man sang mga nagkaladula sa balay sang biktima base sa inisyal nga pagpangusisa sang kapitan.
Sa impormasyon nga nakuha sang Aksyon Radyo Iloilo, ginsulod sang suspect ang German national sa iya balay kag gintiro. Nakadalagan pa siya agud magpalagyo apang nasugat-an niya ang isa pa ka suspect kag liwat siya nga gintiro. Nagpalagyo ang mga suspetsado sakay sa motorsiklo.
