Wala sang kanselasyon sang klase nga gin-anunsyo si Iloilo City Mayor Jerry Treñas sa pihak sang ginaplano nga isa ka semana nga untat biyahe sang transport group Manibela nga masugod buwas, Marso 6.
Base sa Facebook post sang alkalde, “classes will go on as usual.”
Pero ginpabutyag niya nga maga-monitor sang sitwasyon ang Public Safety and Transportation Management Office (PSTMO), City Admin, kag si Vice Mayor Jeffrey Ganzon.
I-preparar man sang city government ang apat ka modernized jeep, tatlo ka bus, kag iban pa nga mga salakyan sang siyudad agud i-deploy kun kinahanglanon.
Una na nagpahibalo ang mga transport groups kag cooperatives sa Western Visayas nga indi sila mag-upod sa ginaplano nga transport strike. – via Jerry Treñas FB page
