Police nga nasulat ang ngalan sa papel nga nakit-an sa tupad sang utod nga kamot sa Bacolod City ginpanginwala nga involved siya sa illegal drugs

Ginpanginwala ni Police Staff Sergeant Anthony Vistar sang Bacolod City Police Station 5 ang kahilabtanan sa illegal drugs.

Nasulat ang ngalan ni Vistar sa papel nga nakit-an sa tupad sang utod nga kamot sang tawo nga nasapwan sa Purok Riverside, Brgy. Bata, Bacolod City kahapon sang aga.

Nabutang sa papel ang “Anthony “Tata” Vistar Pusher Protector Kawatan!!!! Panghulidap Imo Ubra !!!! Bulang pa more ah!!!!”

Suno kay PCapt. Francis Depasucat, hepe sang Bacolod City Police Station 5,nga nagpabutyag si Vistar nga indi matuod ang akusasyon batok sa iya.

Aktibo nga pulis sa ila estasyunan si Vistar kag na-assign sa Station Drug Enforcement Team, suno kay Depasucat.

Posible suno sa iya nga may grupo ukon sindikato nga “naigo” sadto si Vistar rason nga ginaguba ang iya ngalan.

Gin-athag ni Depasucat nga wala sang may gina-intrahan nga ilegal nga aktibidad ang amo nga pulis.

Gin-relieve anay sa SDET si Vistar samtang nagapadayon ang imbestigasyon.