ILOILO— Malapit sa P1 Million nga balor sang suspected shabu ang na-recover sa separado nga drug buy bust operation sa Pavia kahapon, Sept. 9.
Una nga nadakpan sa operasyon sang Pavia police las-12:33 sang kaagahon sa Brgy. Pagsanga-an si alyas Biboy, 34-anyos nga residente sang Brgy. San Isidro, Jaro.
Suno kay Police Major Dadje Delima, hepe sang Pavia Municipal Police Station, indi magbaligya si Biboy sang illegal drugs kun magnubo sa P7,000 ang transaksyon.
Sa pagpangusisa sang police, kay alyas Boss sa Bakhaw, Mandurriao nagakuha sang supply sang illegal drugs ang subject.
Na-recover kay Biboy ang 65 grams sang suspected shabu nga ginabanta may standard drug price nga P442,000.
Samtang nadakpan naman sa operasyon sa Brgy. Mali-ao, Pavia las-11:05 kaina sang aga si alyas Alog, 45-anyos sang Brgy. Purok 1, Pavia.
Ginpabutyag ni Delima nga nagapakilala nga nursing attendant sang ospital sa syudad ang subject pero natukiban nga isa na siya ka tuig gin-terminate sa trabaho.
Nakuhaan ang subject sang 72 grams sang suspected shabu nga ginabanta nagabalor sang P489,600.
Nagapanawagan si Iloilo Police Provincial Office Director Police Colonel Bayani Razalan sa publiko sa suporta agud mabatuan ang paglapta sang illegal nga druga. — via Aksyon Farrah Mae Morano
