ILOILO CITY—Matukod sang project evaluation team ang Department of Public Works and Highways (DPWH) 6 nga magapanguna sa pag-imbestigar sa flood control projects sa Iloilo.
Ini makaligad ang pahayag ni President Ferdinand Marcos, Jr., nga may “delayed” kag “palpak” nga proyekto sa Iloilo sang nagbisita siya sa siyudad sang Agosto 13.
Suno kay DPWH 6 Assistant Regional Director Jose Al Fruto, tungod wala direkta nga gintumod sang presidente kon sa probinsiya ukon siyudad nga flood control projects ang delayed kag palpak, mahimo na lang sila sang assessment kag evaluation sa tanan nga proyekto sa bug-os nga Iloilo.
Sa initial nga plano, unahon nga imbestigaran sang DPWH 6 ang mga on-going construction nga proyekto.
Wala ginapanginwala kag wala man gina-aku ni Engr. Fruto ang nasambit nga pahayag sang presidente gani nga mahimo sila sang project evaluation. Nagapati siya nga maklaruhan ang tanan kon may resulta na ang evaluation.
Ang nasambit nga team sang DPWH 6, separado sa team nga gin-deploy sang DPWH Central Office nga ginmanduan nga mag-imbestigar sa tanan nga flood control projects sa Iloilo City.
Sa subong, ginadihon pa sang DPWH ang mangin kaundan sang evaluation. Sa tion nga maplastar ang team sang DPWH 6, amo pa lang ang pagtumod sa mga iprayoridad nga mga proyekto.
