ILOILO — Ginpanginwala sang delivery rider nga nadakpan sa drug buy bust operation sa Barangay Burgos-Gengos, Guimbal las-5:30 kaina sang hapon nga iya ang na-recover nga suspected marijuana.
Suno kay Plt. Ronnie Saldevia, deputy chief of police sang Guimbal Municipal Police Station, gina-insister sang subject nga si alyas Ed, 39-anyos nga residente sang Capiz pero temporaryo nga nagatiner sa Pavia nga ma-deliver lang siya sa lugar kag wala nakahibalo sang unod sang ziplock nga ginpadala sa iya.
Nakuha sa subject ang isa ka sachet sang ginapatihan dried marijuana leaves nga mga bulak pa kag cookie nga ginapatihan may na-impon nga marijuana.
Ginabanta nagabug-at sang 4.5 grams ang sachet sang ginapatihan high grade marijuana kag nagabalor sang P3,375.
Tatlo ka semana ang nangin monitoring sa subject tubtob nadakpan. — Aksyon Maria Kayla Tingzon
