Salakyan sang Iloilo City Government, Liga ng mga Barangay nalitratuhan nga naga-park sa guwa sang mall sa Molo, kapehan sa Jaro

Iloilo City – Pareho nga nalitratuhan ang service vehicles sang Iloilo City Government kag Liga ng mga Barangay sa guwa sang mall sa Molo kag kapehan sa Jaro sang Domingo, Mayo 25 – wala sang opisina.

Sa guwa sang mall sa Molo, natukiban nga gingamit ni Councilor Sheen Marie Mabilog ang service vehicle ni Vice Mayor Lady Julie Grace Baronda.

Sa litrato nga kuha las-3:23 sang hapon, ginpaathag ni Mabilog nga nagpamakal siya sang school supplies sa GT Mall para sa “Balik Eskwela Program” sang iya nga opisina.

Sa guwa sang kapehan sa C1 Road sa Buhang, Jaro, nakuhaan man sang litrato ang salakyan sang Liga ng mga Barangay.

Ginpaathag ni Liga ng mga Barangay – Iloilo City Chapter President Irene Ong, nag-meeting siya sa mga kapitan sa Jaro agud madiskusyonan ang pagpatuman sang Barangay Scholarship sa idalum sang “Bawat Barangay Makikinabang” Program.

Base sa Memorandum Circular 2026-011 sang Department of the Interior and Local Government (DILG), ginapahanumdom ang tanan nga covered officials kag employees “that the use of government-owned vehicles on Saturdays, Sundays, and holidays is prohibited, except when such use is directly connected to the performance of official functions.” — Aksyon Marvin Malificiar