Amay patay, bata pilason sang nakabunggo ang ginasakyan nga motorsiklo sa naka-park nga pickup sa San Dionisio

ILOILO— Patay ang amay samtang pilason ang iya nga bata sang nakabunggo ang ginasakyan nga motorsiklo sa Brgy. Cubay, San Dionisio kahapon, Hulyo 3.

Suno kay Police Captain Jesus Batilante, OIC sang San Dionisio Police Station, halin sa Brgy. Bagacay kag pakadto sa Brgy. Cubay ang motorsiklo nga ginamaneho ni alyas Rodulfo, 57-anyos kag angkas ang iya nga 16-anyos nga bata nga lalaki.

Naglabay sa kurbada nga porsyon sang karsada ang motorsiklo kag nakabunggo sa pick up nga naka-park, suno sa pulis.

Ginalantaw sang pulis nga wala na-antisipar sang driver nga may mabungguan siya gani medyo madasig ang pagmaneho.

Nagtabog ang mag-amay kag napilasan sa ulo tungod wala sang ginasuksok nga helmet.

Pareho nga gindala sa ospital ang duha pero dead-on-arrival ang amay samtang ginabulong pa ang iya nga bata. — Aksyon Farrah Mae Morano