ILOILO — Naghiwat sang public hearing sa Abilay Sur Chapel sa Oton ang mga opisyal kag mga residente para istoryahan ang plano nga pagtukod sang sang gina-proponer nga 10-hectare Hyperscale AI Data Center Campus.
GIn-istoryahan sa meeting ang maayo kag indi maayo nga epekto sang Data Center.
Lakip sa nagtambong sa meeting si Vice Mayor Jose Neil Olivares kag si Daniel Stefan Robertsen, ang Norwegian nga managing director kag AI Data Center Developer.
Apang nag-walkout na si Robertsen sa una pa lang nga pamangkot kag nagpamuyayaw sa mga katapo sang media sang gintuyo nga interviewhon.
Suno kay Oton SB Member Maria Lorna Geonigo, indi manami para sa mga taga-Oton ang pag-walk out sang Norwegian investor sa public hearing. Tion kuntani ini agud makapaathag si Robertsen sa katuyuan sang proyekto.
Para sa SB member, indi deserve sang mga Ogtonganon ang aktwasyon ni Robertsen.
Gintawag naman ni Vice Mayor Olivares nga unprofessional ang ginhimo ni Robertsen.
Una diri, ginapamangkot ni Oton SB member Annie Rose Paro kon sa diin mahalin ang source sang tubig para sa ila cooling hub nga gamiton sa Data Center nga plano ipatukod sa Brgy. Abilay Sur.
Ginpaathag ni Robertsen nga may coordination sila sa Metro Pacific Iloilo Water District (MPIW).
Dugang pa niya nga i-recycle ang tubig nga gamiton sa ila nga Data Center.
ANO ANG DATA CENTER?
Ang Data Center amo ang pasilidad nga maga-centralize sang location store, maga-proseso kag maga-manage sang digital nga information.
Ang amo nga Data Center ginatawag man nga “hidden engine rooms” sang internet.
