35 ka cellphones na-recover sa sulod sang jail facility sa Ungka, Jaro — BJMP 6

ILOILO CITY — Naka-recover sang 35 ka touchscreen cellphones sa sulod sang facility sa ginhimo nga greyhound operation sa Iloilo City District Jail – Male Dormitory sa Ungka, Jaro kaina sang aga.

Magluwas sa cellphones, may na-recover man nga apat ka sim card starter packs, charger kag vape sang gin-inspection ang mga gamit sang Persons Deprived of Liberty (PDLs) sa amo nga facility.

Ang ginhimo nga greyhound operation ang kabahin sa mandu sang bag-o nga Regional Director sang Bureau of Jail Management and Penology (BJMP) nga si Jail Chief Superintendent Elema Rocamora, PhD agud masigurado nga wala sang mga iregularidad sa sulod sang jail facility sa rehiyon.

Matandaan, Septiyembre 14 sang nag-conduct man sang greyhound operation sa Iloilo District Jail- Male Dormitory kag Iloilo District Jale-Male Dormitory Annex sa Barangay Nanga, Pototan ang BJMP kag Philippine Drug Enforcement Agency (PDEA).

Sa amo nga operasyon naka-recover ang PDEA 6 kag BJMP 6 sang tatlo ka gramo sang suspected illegal drugs kag duha ka keypad nga cellphones.