ILOILO – Patay ang 19-anyos nga lalaki sang gintiro kag ginkastigo sang mag-amay sa Sara Road, Brgy. Poblacion Ilawud, Passi City sang Oktubre 31 sang gab-i.
Ginkilala ang napatay kay Alyas Ronel sang Brgy. Magdungao. Samtang, ang suspetsado si Alyas Erne, 37, nga taga-Alimono, Passi City pero temporaryo nga naga-estar sa Brgy. Poblacion Ilawud.
Suno kay PLTCOL Peter John Pisueña, OIC sang Passi City Police Station, naga-inum-inom ang biktima kaupod sang iya mga barkada sang nag-abot ang suspect nga kaupod ang duha niya ka kabataan nga lunsay menor-de-edad.
Gulpi lang nga gintiro sang suspect ang biktima nga naigu sa kilid sang iya lawas. Sang natumba ang biktima, ginpulihan siya kastigo sang duha ka kabataan sang suspect.
Sa pagpangusisa sang kapulisan nga nagasuya-ay ang biktima kag ang kabataan sang suspect.
Gilayon man nga gindala sa Don Valerio Memorial District Hospital ang biktima pero napatay samtang ginabulong.
Nagsungka sa kapulisan ang suspect pagkatapos sang krimen, nga presu na subong sa Passi City Police Station.
Natalana nga pasakaan sang kaso ang suspect.
