ILOILO—Naglab-ut sa 21 ang napatay tungod sa dengue sa probinsya sang Iloilo.
Ini base sa 41st Morbidity Week report sang Iloilo Provincial Health Office (PHO), halin Enero 4 tubtob Oktubre 17.
Base sa report, pinakamataas ang na-record nga dengue-related deaths sa banwa sang Estancia nga may walo ka mga napatay.
Ginsundan ini sang Carles nga may lima kag Ajuy nga may duha.
May tig-isa man ka napatay sa San Dionisio, Sara, Miagao, San Rafael, Dingle, kag San Joaquin.
Sa kabug-usan, sa 4,552 ang na-record nga dengue cases sa probinsya sa amo nga period mas manubo ini sang 11% kon ikumparar sa 5,102 ka kaso sa kapareho nga period sang tinalikdan nga tuig.
Ginahingyo sang PHO ang mga kabanwahanan nga magsunod sa 4S kontra dengue, ilabe na ang search and destroy operation sang mga breeding sites sang lamok kag seek early consultation sa tion nga makabatyag sang mga sintomas.
