ILOILO — Daku nga pilas sa ulo ang gintunaan sang kamatayon sang driver sang motorsiklo nga nakabunggo sa sumalang nga Canter truck sa Barangay Caw-i, Batad las-4 kahapon sang hapon, Mayo 23.
Suno kay Police Staff Sergeant Ellan Jade Escrupulo, imbestigador sang Batad Municipal Police Station, nagapataklad ang motorsiklo nga halin sa Concepcion kag pakadto sa Batad sang nakabunggo sa Canter truck.
Halin naman sa Estancia pakadto sa Barotac Viejo ang Canter truck.
Nagguwa sa imbestigasyon nga samtang nagapasaka ang motorsiklo, nang-agaw ini sang lane gani nagdiretso sa Canter truck.
Tungod sa impact nagtabog ang driver halin sa ginasakyan nga motorsiklo.
Gindala sa ospital ang driver sang motorsiklo pero gindeklarar nga dead-on-arrival.
Wala sang suksok nga helmet ang driver sang natabo ang aksidente.
May settlement man ang driver sang truck kag pamilya sang napatay. — Aksyon Maria Kayla Tingzon
