Malapit 2,000 ka mga tricycle drivers halin sa 4 ka banwa sa Iloilo nakabaton sang P5,000 nga cash aid

Iloilo – Nakabaton sang P5,000 nga cash relief assistance ang 1,993 ka mga tricycle drivers halin sa Anilao, Banate, Barotac Nuevo, kag Dumangas subong nga adlaw.

Gintingub ang payout para sa apat ka mga banwa sa Tamasak Arena sa Barotac Nuevo nga ginpangunahan sang mga personnel sang Department of Social Welfare and Development (DSWD) 6.

Sa kabug-usan, ginpahayag sang DSWD 6 nga ₱9,965,000.00 ang napanagtag nga cash relief assistance sa mga drivers nga miyembro sang nagkalain-lain nga tricycle operators and drivers’ associations (TODAs) sa nasambit nga mga banwa.

Ang amo nga payout kasugpon sang pilot implementation sa Iloilo City kag Passi City sang nagligad nga semana agud mabuligan ang mga tricycle drivers tungod sa pagtimbuok sang presyo sang gatong.

Una na nga ginpahibalo sang DSWD 6 nga sunod nga maka-ambit sang ayuda ang mga tricycle drivers halin sa iban nga mga banwa sa probinsiya. — DSWD Western Visayas