ILOILO— Nadakpan sa drug bust operation kag nakuhaan sang P4.4 million nga balor sang suspected shabu ang mag-live in partner sa Zone 5, Brgy. Talacuan, Leon kagab-i.
Suno kay Police Captain Glenn Soliman, Assistant Chief sang Regional Police Drug Enforcement Unit (RPDEU), subject sang operasyon kanday alyas Eric, 47-anyos nga residente sang amo man nga lugar, kag iya partner nga si alyas Letlet, 49-anyos nga tumandok sang Zone 1, Brgy. Tanza Esperanza, City Proper.
Ginpabutyag ni Soliman nga nabaton nila ang impormasyon sang masobra lima na ka bulan may kaangtanan sa illegal nga aktibidad sang duha.
Gin-validate ang impormasyon tubtob nahuman ang transaksyon kagab-i.
Na-recover ang 665 grams sang suspected shabu nga may standard drug price nga P4.4 million.
Sa pagpangusisa sang pulis, kon ma-pick up na sang duha ang illegal drugs sa ila nga source, ginatago nila kag gina-repack para ibaligya sa ila mga customer.
Napresu na si Eric sa kaso may kaangtanan sa illegal drugs kag sang 2025 lang nakagwa sa presuhan.
