ILOILO — Nakapkapan na lang sa idalom sang tubig ang pangayaw nga nalumos sa beach resort sa Barangay San Roque, Barotac Viejo kahapon sang hapon.
Suno kay Police Major Francis Batallones, hepe sang Barotac Viejo Municipal Police Station, naghagaray ang nalumos nga si alyas Toto, sang Barangay Balabag, San Rafael kag iya mga abyan nga maglangoy sa baybay sang wala na siya natalupangdan kag gulpi lang nadula.
Sa pagpati sang iya mga abyan, tungod nga naka-inom sang makahulubog nga ilimnon — nalumos si Toto.
Indi man madalom ang ila ginalanguyan kag indi man kantilando, suno sa pulis.
Nagpangayo sang bulig ang mga abyan sang nalumos sa personnel sang Municipal Disaster Risk Reduction and Management Office (MDRRMO) kag Philippine Coast Guard sa pagpangita sa iya.
Makaligad ang 30 minutos kag nakita siya nga nagalugdang pa.
Pagtakas sa nalumos, unresponsive na siya kag wala na sang pulso.
Gindala siya sa ospital pero gindeklarar nga patay.
Ini ang una nga tion nga may nalumos sa amo nga beach resort base sa records sang pulis.
