ILOILO CITY — Nagreklamo sa ila Punong Barangay ang 16-anyos nga nobya nga ginhimuslan siya sang iya 14-anyos nga nobyo kaupod ang tatlo pa ka barkada sa payag sang Abril 16 sa Molo.
Suno kay Police Captain Ryan Christ Inot, hepe sang Molo Police Station, ang Women and Children Protection Desk (WCPD) ang nagpanguna sa pag-imbestigar sa reklamo ni alyas Love.
Nagaguwa sa imbestigasyon sang kapulisan nga ginplano sang nobya kag nobyo nga may matabo sa ila.
Pero nag-abot ang tatlo ka barkada sang iya nobyo nga nag-intra sa ginahimo sang duha.
Nagpasugot man suno sa pulis ang nobyo nga himuslan sang iya tatlo ka barkada ang iya nobya.
Naga-edad sang 14-anyos kag 15-anyos ang mga ginareklamo nga naghimulos kay Love.
Nagpanginpadlos ang nobya pero tungod pwersado ang apat, wala siya sang may nahimo tubtob nga ginhimuslan.
Gilayon siya nga nagreklamo sa ila punong barangay kag gin-report ang natabo sa pulis.
Isa pa lang ka bulan ang relasyon ni Love sa iya 14-anyos nga nobyo.
Na-rescue sang mga kapulisan ang mga ginareklamo sa ila ginapanaguan nga balay sa amo nga barangay kag gin-aku nga ginhimuslan nila si Love, suno kay Inot.
Base sa medical result ni Love, positibo nga may sexual intercourse nga natabo sa iya.
Natukiban sang mga pulis nga naggamit sang marijuana ang apat antes ang paghimulos.
Napasakaan na sang kaso nga rape ang apat ka menor-de-edad kag subong yara na sa Balay Dalayunan.
Note: Hungod nga wala ginbutang ang Barangay tungod nga menor-de-edad ang mga involved. — Aksyon Angel Mae Ciudad
