(UPDATE) Himata sang Suspek sa Pagtiro-patay sa Nag-AWOL nga Soldado sa Barotac Viejo, Nag-athag nga Wala sang Kamatuoran ang Akusasyon

Iloilo–Nagdangup sa Aksyon Radyo Iloilo ang himata ni Loney Baleno, 37-anyos sang Sitio Ilaya, San Roque, Barotac Veijo agud tadlungon nga indi ini ang suspek sa pagtiro patay kay Aldrin Belo, 29-anyos sang Roxas, Tapaz Capiz kag nag-AWOL nga suldado sang Philippine Army.

Gin-athag ni Rodelyn Aguilar, tiya ni Loney, nga indi suspek ang iya hinablos kundi amo pa ang nakakita kag nagbulig sa biktima sang nakita ini nga nagahuray-ad sa dalan sang Mayo 29. Suno kay Aguilar, lain ang blotter report sa Barotac Viejo police kag lain man ang nakalab-ot sa IPPO gani nakibot sila sang naguwa ang balita nga ang hinablos ang ginatudlo suspek sa krimen.

Ang iya hinablos amu ang nagreport sa mga pulis matapos sini nasapwan nga duguon ang biktima. Nagpangayo ini sang bulig sa Aksyon Radyo agud indi mabutang sa delikado ang kabuhi sang iya hinablos.

Nagpanawagan man ini sa pamilya sang biktima sa Capiz nga indi pagdumtan ang iya hinablos bangud wala ini sang kahilabtanan sa krime. (Aine Grace Bravo)