Lalaki patay sang naigo sang elesi sang motorbanca sa Antique

Patay ang 29-anyos nga lalaki sang naigo sang elesi sang motorbanca sa Brgy. Bagumbayan, Laua-an, Antique kahapon.

Ginkilala ang biktima kay Hanzel Buyco, residente sang Brgy. Guinbanga-an, Laua-an, samtang ang suspek ginkilala kay Mark Michael Acosta, residente sang Bacjawan Sur, Concepcion.

Suno kay Police Captain Josielito Yana, officer-in-charge sang Laua-an Municipal Police Station, naga-practice sang iya motorbanca si Acosta bilang preparasyon sa Pamalaran Festival sa nasambit nga probinsya sang natabo ang insidente.

Ang biktima yara sa baybay tungod participant siya sa pagpangdakup sang bibe nga kabahin man sang nasambit nga festival.

Sang naga-practice na sa lawod ang biktima, ginpahayag sang police nga manugdungka na kuntani ang suspek apang madamo sang tawo rason nga nagliko siya agud malikawan ang mga tawo.

Wala niya natalupangdan ang biktima nga nagsalom rason nga sang nagbutwa na si Buyco, nalab-ut sang elesi ang biktima kag naigo sa abaga kag sa iya dughan nga gintunaan sang iya kamatayon.

Gin-custody sang police ang suspek. Indi naman magpasaka sang kaso ang pamilya sang biktima suno sa police. — via Aksyon Paula Elambayo