Councilors Plaridel Nava kag Joshua Alim, Nagsoksok sang Itom nga Amerikana sa Baylo nga Barong sa Una nga Session sang Bag-o nga Set sang City Council bilang Protesta sa indi Pag-imbitar sa ila sa Meetings

Iloilo City —  Wala nagapataha si Vice Mayor Jose Espinosa III bilang amay sang Sangguniang Panlungsod.

Natapos na ang Mayo 9 nga eleksyon suno kay Councilor Plaridel Nava apang ginalamuran gihapon ni Espinosa sang politika ang city council.

Kasunod ini sang meeting nga ginpatawag sang bise alkalde sang Hunyo 30 sa diin may gin-assign ini nga mangin chairman sang committee kag barong ang isoksok sang session sa Hulyo 5.

Apang wala ginpabalo sanday Councilors Joshua Alim kag Nava.

Sanday Nava kag Alim ang nagsoksok sang amerikana samtang nagtambong sa session bilang protesta kay Espinosa.

Dapat suno kay Nava nga indi magsunod-sunod si Espinosa kay Mayor Jed Patrick Mabilog bangud lain nga departamento ang konseho.

Suno pa sa konsehal, maayo lang si Espinosa sa kutaw-kutaw nga istorya apang bisan isa ka ordinansa, wala ini sang ginpasar sa 6 ka tuig nga pagpangalagad sa Sangguniang Panlungsod.

Wala man suno sa iya nagakabalaka si Espinosa sa sitwasuon sang mga konsehal. (JoMaque)