Task Force on Moral and Values Formation, nagpa-athag nga regular nga naga-operate batuk sa nagalapas sang Curfew for Minors Ordinance

Iloilo City–Regular naga-operate ang Task Force on Moral and Values Formation agud magpangdakup sang mga menor-de-edad nga nagalagaw sang tungan gab-i tubtub sa kaagahon.

Suno kay Task Force Head Jorge Duron, nagalibot sila kada gab-i agud ma-implementar ang Curfew for Minors Ordinance sa kada distrito. Pa-athag ni Duron, Lunes tubtob Sabado halin alas-8 sa gab-i tubtob alas-3 sa kaagahon sila nga nagapatrolya nga may kaupod nga social worker kag mga pulis. Kada Lunes, naga-operate ang Task Force sa Jaro; sa Lapuz/Lapaz area kada Marte; City Proper kada Miyerkules; Molo kada Huwebes; Arevalo kada Biyernes kag Mandurriao kada Sabado.

28 ka mga menor-de-edad na ang nadakpan sang Task Force subong nga tuig kag anum sa ila ang ginpadal-an sang ikaduha nga notice. Imposible namanman suno kay Duron nga mapakot sang Task Force ang mga insidente nga ginadalahigan sang mga minors.

Gin-athag ni Duron nga wala sila nagapabaya sa pagpangdakup sang mga menor-de-edad kag paglaygay sa mga ginikanan sa ila nga salabton kun mahibaluan nga nagapabaya kag wala nagadisiplina sa ila kabataan. (AGB)