Anay punong barangay sa Pototan, arestado sa raid!

Pototan, Iloilo–Arestado ang anay punong barangay sang Intaluan, Pototan sa raid sa iya balay kaina sang aga may kaangtanan sa illegal nga druga.

Si ex-Kapitan Ramon Platon ang numero uno nga target sang Philippine Drug Enforcement Agency ukon PDEA 6 sa probinsiya. Suno kay PDEA 6 Assistant Regional Director Levi Ortiz, si Platon ang miembro sang Ilonggo Group kag may kaso sang robbery, double murder kag kidnapping.

Nagtuyo pa siya nga magbato sa raiding team pero nangin madasig suno kay Ortiz ang hulag sang mga operatiba kabangdanan wala na ini sang may nahimo.

Ginabanta sa P8 million ang market price sang ginabanta isa ka kilo sang suspected shabu nga narecover sa raid sa balay ni Platon. Ang item suno kay Ortiz nasulod sa Chinese tea bag nga pareho man sa narecover sa Cebu.

Duda sang PDEA, naghalin pa sa Cebu ang supply ni Platon sang druga. Natalana nga ipa-examine sang PDEA ang ila narecover agud masiguro nga shabu gid man.

Magluwas sa suspected shabu, nakuha man ang mga bala sang M16 rifle sa amo nga raid. (AGB)