Linibo ka pulis, gindeploy para sa ASEAN meetings sa Iloilo City!
Iloilo City–Linibo ka mga pulis ang gin-deploy sa bug-os nga syudad sang Iloilo para sa Association of Southeast Asian Nations ukon ASEAN meeting sugod subong nga adlaw.
Suno kay Police Regional Office 6 Public Information Officer PSUPT Gilbert Gorero, naghiwat sila sang send-off ceremony kahapon sa Campo Delgado kaupod ang 21 ka mga partner agencies kag mga bisita halin sa national offices. Sang damlag lang, nag-abot man sa syudad ang mga patrol cars sang national support units sang PNP agud magdugang sa pagbantay sa seguridad sa mga delegado.
May security detail ang kada delegado agud magbantay bisan diin sila magkadto suno pa kay Gorero.
Magluwas sa PRO 6, preparado naman ang iban nga ahensya sang gobyerno agud masiguro ang kadalag-an sang pag-host sang syudad subong nga tuig nga magadungan sa ika-50 nga anibersaryo sang ASEAN.
Iga-host sang syudad ang ika-22 nga Senior Officials Meeting para sa ASEAN Socio-Cultural Community Council kag ang 17th ASCC meeting sugod subong nga adlaw tubtub sa Marso 9. Ang syudad man ang mangin venue para sa 3rd ASEAN Organization for Economic Cooperation and Development for Good Regulatory Practice Network meeting sa Marso 14 kag 15. (AGB)