Duha pilason sa shooting incident sa Pototan!

Pototan, Iloilo — Napilasan sa wala nga paa ang tag-iya sang Doods KTV Bar nga si Edgar Dador matapos gin-alegar gintiro sang isa sa apat ka costumer sa Barangay Rumbang, Pototan. Napilasan man ang ginatudlo nga suspek nga si Fernand Delgado sang Barangay Alalasan, Lapuz matapos ginpahayag gintiro ni Dador.

Suno kay P02 Raffy Gonzales, imbestigador sang Pototan Police Station, nagbaisay sanday Dador kag Delgado parte sa balayran sa gin-inum nga beer nga 610 pesos. Alegasyon sang grupo ni Delgado, makaduha ka beses sila nga ginsukot ni Dador. Suno kay PO2 Gonzales, naguwa si Dador sa KTV Bar kag may dala na nga pusil kag may nabatian na lang nga lukpanay.

Narecover sa crime scene ang duha ka empty shell sang 45 caliber pistol samtang narecover naman sa possession sang grupo ni Delgado ang 38-caliber revolver nga may lima ka mga bala sa diin tatlo diri ang naglupok. Nagpalagyo si Delgado sakay sa multicab kaupod sanday Ronald Pareño; Ron Moises Pareño kag Rene Paul Villareal pagkatapos sang shooting incident apang nadakpan sa follow-up operation sa Barangay Amamaros. Wala naman narecover sang mga pulis ang 45 caliber pistol. Dugang PO2 Gonzales, lunsay arestado ang lima samtang nagapadayon ang imbestigasyon sa krimen. (JoMaque)