Pagdeklarar sa Leon kag Alimodian nga Eco Tourism Zone, ginsuportahan sang Sangguniang Panlalawigan

Iloilo City — Ginsuportahan sang Sangguniang Panlalawigan ang ordinansa ni 2nd district Congressman Arcadio Gorriceta nga magadeklarar sa 14 ka kabaranggayan sa Leon kag 7 ka kabaranggayan sa Alimodian nga Eco Tourism Zone. Gin-sponsor ni 2nd District Board Member Demy Sonza ang resolution nga amo man ang chairman sang Committee on Arts, Culture and Tourism sang Sangguniang Panlalawigan. Suno kay Sonza, sa tion nga maaprobahan ang ordinansa, magatigana sang pondo ang national government agud magsanyog ang lugar. Mabugnaw ang lugar suno kay Sonza kag makasarang mag-supply sang ulutanon kag frutas ang Leon kag Alimodian sa Isla sang Panay. Kon madeklarar nga Eco Tourism Zone ang Leon kag Alimodian, mapamatud-an suno kay Sonza ang slogan nga “It has to be Iloilo”.  Una na nga naaprobahan sang provincial board ang ordinansa nga nagadeklarar sa Leon nga “Summer Capital” sang Iloilo. (JoMaque)