(UPDATE) Governor Arthur Defensor, nagapati nga personal ang desisyon ni Guimbal Mayor Oscar Garin nga masuporta ang ila pamilya kay Congressman Ferj Biron

Iloilo–Personal lang nga desisyon ni Guimbal Mayor Oscar Garin ang deklarasyon nga suportahan sang pamilya Garin si 4^th District Congressman Ferj Biron sa 2019 elections.

Sa pagpati ni Gov. Arthur Defensor, wala pa natapos ang pag-istoryahanay nila sang pamilya Garin bangud wala man nakahambal sanday 1^st District Congressman Richard Garin kag former Health Secretary Janette Garin nga suportahan nila si Biron.

Suno sa gobernador, open-ended ang ila pag-istoryahanay kag maguwa ang desisyon sa sulod sang duha ukon tatlo ka adlaw.

Wala naman gina-entertinar sang gobernador ang posibilidad nga magbackout sa iya kandidatura ang iya bata si 3^rd District Congressman Arthur ‘Toto’ Defensor Jr.

Kumpiyansa si Defensor nga madaug ang kongresista bangud yara sa iya ang sentimiento sang mga pumuluyo kag lideres sa premier distrito.

Nagapakita man suno sa iya sa resulta sang survey sa pagka-gobernador sang damlag lang nga halos pilo ang abanse ni Congressman Defensor batuk kay Biron. (AGB)