ProFriends, nanindugan nga indi magpasugot sa pag-inspeksyon sang lgu-pavia sa balay sang nagareklamo nga mga home owners

Iloilo City — Nanindugan ang tagdumahan sang PROFRIENDS, developer sang Parc Regency, nga indi sila magpasugot sa pagkutkot sa porsyon sang mga balay sa ila subdivision sa pag-inspect sa pundasyon sang structure.

Ini matapos ginreklamo sang pila ka mga home owners sa Parc Regency Phase Q sa Brgy. Balabag, Pavia nga mahuyang ang pundasyon sang ila mga balay.

Suno kay Engr. Boyet Tejada sang PRO FRIENDS, mapasugot lang sila nga inspeksyunon ang mga balay kun may valid nga basehan ang mga tagreklamo.

INDI PAT-OD

Indi pa pat-od kun san-o gid man makakonekta ang Parc Regency sa linya sang Metro Iloilo Water District ukon MIWD.

Suno kay Dina Estocado, general manager sang PRO FRIENDS – Iloilo, may mga factors nga indi nila kontrolado apang nagpasalig nga prayoridad nila ini.

Una na ginpasalig sang PRO FRIENDS nga makakonekta na ang subdivision sa MIWD sa Marso, 2019 kasunod sang conference kaupod sang nagareklamo nga mga homeowners sa opisina ni Pavia Mayor Michael Gorriceta.

Matandaan, nagpositibo sa Fecal coliform kag E. Coli bacteria ukon higko sang tawo ukon sapat ang water supply sa Parc Rergency kasunod sang bacteriological test nga ginhimo mismo sang tagdumalahan sang subdivision.

Bisan nag-flashing kag gintinluan sang PRO FRIENDS ang ila water tank sang damlag lang, liwat nga nagpositibo sa bacteria ang ila water supply sang ginpa-idalum liwat sa test. (JoMaque)