(UPDATE) Grade 3 teacher sa Passi City nga brutal nga ginpatay, natukiban nga ginkawatan

Passi City – Ginkawatan si Ma. Corazon Tionson y Doblado, 55, single kag Grade 3 teacher sang Gemumua-Agahon Elem. School nga bangkay na sang nasapwan sa iya balay sa Barangay Gemumua-Agahon kaina sang aga, Oktubre 15.

Suno kay Barangay Tanod Ariel Pagay nga isa sa mga nagresponder sa balay ni Tionson, nagalinapta ang kagamitan sa sulod sang balay sang maestra kag natukiban nga may nagkaladula.

May narecover suno kay Pagay nga iban nga gamit sang maestra sa balay ni June Aguilar, 34 nga tumandok man sang amo nga barangay, kag parolado sa kaso nga murder.

Ginpahayag ni PSUPT. Arturo Fullero, hepe sang Passi City Police Station, nga suspek nila si Aguilar kag padayon ang ila hot pursuit operation.

Nagahapa sa iya hiligdaan, hublas, nabaklid kag may busal sa baba si Tionson sang nasapwan sang iya labandera mga alas-10 kaina sang aga. May duha ini ka pilas sang pagkabuno sa likod kag may igo sang ginapatihan martilyo sa ulo ang biktima.

Si Tionson ang taga-Jaro apang naga-istar na sa Gemumua-Agahon bangud tinuig na nga nagatudlo sa barangay. (JoMaque)