(UPDATE) Suspek sa brutal nga pagpatay sa Grade 3 teacher sa Passi City, nadakpan; suspek, nag-ako sa krimen
Passi City, Iloilo–Gin-ako sang suspek nga si June Aguilar, 34-anyos sang Gemumua-agahon, Passi City nga siya gid man ang nagpatay kay Ma. Corazon Tionson, 55-anyos, maestra sang Gemumua-agahon Elementary School.
Nasapwan ang bangkay sang maestra sang Oktubre 15.
PAANO NATABU ANG KRIMEN
Suno kay Aguilar, ginsulod niya ang balay sang maestra sang nabatian niya nga nagahuganas ang tubig sa sulod kag nagpinsar siya nga nagapanibin ini.
Sang iya ginlingling ang sulod sang balay, nakita sini nga nakatampi lang ang maestra kabangdanan iya ginsulod.
Luyag lang kuntani niya ini nga himuslan apang nagbatu ang biktima rason nga iya ginsuluk-sulok sumbag.
Napun-uran ang maestra kag nalipong. Samtang lipong, ginhimuslan sini ang maestra.
Matapos ang paglugos sa biktima, ginbuno sini sang duha ka beses ang biktima kag ginmartilyo sang tatlo ka beses sa ulo.
Patay na ini suno sa iya sang ginbaklid niya kag ginhigtan ang kamot kag ginbusalan ang baba.
Ginpahayag sang suspek nga wala siya sang plano nga sudlon ang balay ni Tionson kundi nalabayan niya lang.
Ginpanindugan sang suspek nga na-impito siya kabangdanan napatay niya ang biktima.
Mga isa ka oras nga nagtenir sa balay sang biktima si Aguilar antes niya ini ginbayaan.
Nagpalagyo sa bukid ang suspetsado matapos ang krimen.
Ginpanindugan sini nga wala siya nagadruga kundi naka-inom lang sang natabu ang krimen.
Si Aguilar ang walo ka tuig nga napreso sa Muntinlupa bangud sa kaso nga murder. Parolado ini sa amo nga kaso.
PAPEL SANG PUMULUYO AGUD MADAKPAN SI AGUILAR
Natukiban nga magluwas sa payag nga ginateniran sini malapit sa balay sang biktima, may payag man ini sa nabukid nga parte sang Gemumua-agahon nga napalibutan sang kamaisan. Dire ini una nga nagpatupling matapos ang krimen.
Kaina sang kaagahon, Oktubre 20, nakita sang mga taga-Dalicanan ang suspetsado nga nagalakat.
Kilala sang mga tawo si Aguilar bangud naga-konduktor ini sa jeep.
Gilayon nagpakig-angut ang mga taga-Dalicanan sa Barangay Agtabo nga amo ang direksyon nga gina-usoy ni Aguilar.
Gilayon man nag-alerto ang taga-Agtabo kag nag-contact sa taga-Gemumua-agahon.
Nagpadulong si Gemumua-agahon Punong Barangay Samuel Denosta sa Agtabo.
Gin-kordon sang mga opisyal kag tanod ang proper sang Barangay Agtabo sa diin nasiplatan ang suspetsado kag sang na-corner na ini, nakumpirmar sa bulig sang mga opisyal sang Gemumua-agahon nga ini gid man ang suspetsado.
Nagtuyo pa ang suspetsado nga magbatu pero wala nagmadinalag-un. Nadakpan ini pasado las siete sang aga. Nakuha sa iya ang malip-ut nga pusil.
Gin-ako sini nga pakadto siya sa Baraunan sa balay sang iya mga himata.
Nagtawag sa kapulisan ang mga opisyal sang barangay.
Gindala na sa Passi City Police Station si Aguilar. (AGB/MO/JC/KJT)