3 ka salakyan lakip ang ambulansya, nagkarambola sa Lemery; nurse kag himata sang pasyente, nasamaran
Lemery, Iloilo–Nagkarambola ang tatlo ka salakyan lakip ang ambulansiya nga may karga nga pasyente sa Poblacion Southeast, Lemery las dyes kaina sang aga, Nobyembre 12.
Suno kay PO3 Dandy Gallego, imbestigador sang Lemery MPS, halin sa Sara District Hospital ang ambulansiya kag padulong na sa siyudad sang Iloilo agud kuntani isaylo ang pasyente nga nabungguan sang motorsiklo sa Imbaulan, Lemery sang natabu ang aksidente.
Nagpondo ang Adventure para makalusot ang kasugata nga salakyan. Nagasunod ang ambulansiya nga madasig ang padalagan kag nakabunggo sa likod sang nagpondo nga Adventure.
Bangud sa impact, nagbunggo pa gid ang Adventure sa naga-park nga salakyan.
Magluwas sa pasyente nga si Rofelia Asong, 61-anyos, nga una na ginkarga sa ambulansiya, may duha pa gid ka sakay ang ambulansiya nga minor nga nagkalapilasan nga ginkilala kanday Rosalia Orpeza, 55 anyos nga nurse sang Sara district hospital, kag ang himata sang pasyente nga si Dureza Balagantio, 43 anyos, nga gindala man sa ospital kasunod sang aksidente.
Out-patient ang nurse kag himata samtang ang pasyente nga una na nabungguan sang motorsiklo, nasaylo na sa ospital sa siyudad. (AGB)