Councilor Plaridel Nava, nagsabat sa pag-ulamid sa iya sa pagpatay sa iya pakaisa nga si Mercedes “Gingging” Nava; konsehal, nagpabutyag nga may iban pa nga kontra ang biktima

Iloilo City— “Indi ko na mahimo sa akon pamilya.”

Ini ang pahayag ni Councilor Plaridel Nava bilang reaksyon sa pag-ulamid sa iya sa isyu sang pagpatay sa iya pakaisa nga si Mercedes “Gingging” Nava.

Suno sa konsehal, wala siya sang motibo kag indi siya mango agud maghimo sang isyu batok sa iya ilabe na nga malapit na lang ang eleksyon.

Ang paathag ginhimo ni Councilor Nava matapos ginsugid sang utod ni Mercedes sa pulis nga wala sang iban nga kontra ang biktima magluwas lang sa ila “pakaisa nga konsehal.”

Ginkumpirmar ni Councilor Nava nga mag-utod ang ila amay ni Mercedes.

Yara si Nava sa abroad sang ginpatay sang riding-in-tandem si Mercedes sa Calahunan, Mandurriao kahapon sang aga, Enero 4.

Subong lang nga aga, Enero 5, nakapauli sa Iloilo ang konsehal.

Pahayag niya, “reckless” ang statement sang utod ni Mercedes.

Wala sang nadumduman ang konsehal nga nagkomprontahanay sila ni Mercedes luwas lang sa natabu sang 2012.

ANG RAID SANG PDEA

Anum ka tuig ang nakaligad,gin-raid sang Philippine Drug Enforcement Agency (PDEA) sa pagpanguna nanday sadto anay Regional Director Paul Ledesma kag Atty. Ronnie Delicana ang balay ni Mercedes sa Mandurriao.

Gintawgan siya ni Mercedes sang natabu ang raid sa diin subject ang bata sini kag may na-recover nga items.

Gusto sadto nga tiun ni Mercedes nga mag-counter sang kaso batok kay Ledesma kag Delicana pero ginpamatukan sang konsehal bangud suno sa iya ginahimo lang sang PDEA ang ila trabaho magluwas pa nga nangin mag-classmate sila ni Delicana sa College of Law.

Nagsunggod sugod sadto si Mercedes sa konsehal.

THE “BALI BOMBING’

2012, antes ang eleksyon, nagpa-interview sa radyo si Mercedes kag gin-akusaran ang konsehal nga amo ang yara sa likod sang pagpalupok sa Bali Hotel sa siyudad nga ginapanag-iyahan ni Mr. Rommel Ynion.

Si Mercedes sadto ang nagserbe nga whistle blower kag gintudlo niya sanday Councilor Nava kag anay Mayor Jed Patrick Mabilog nga amo ang nagpahaboy sang granada.

Si Ynion ang nagkandidato sadto sa pagka-mayor bunggo kay Mabilog.

Suno kay Councilor Nava, gingamit sadto si Mercedes nga testigo kag nagpahayag nga nabatian gid niya ang pag-istoryahanay sang konsehal kag ni Mabilog kag pagka-aga natabu ang explosion.

Nagpasaka sadto sang kaso si Ynion batok kay Councilor Nava kag Mabilog pero gin-dismiss sang fiscal bangud wala sang probable cause.

Suno kay Councilor Nava, kun may plano siya nga patyon ang iya pakaisa dapat nga madugay na natabu.

Sang damlag lang suno sa iya, wala man sila sang may gin-awayan ni Mercedes luwas lang sang Disyembre 2018.

THE PECO ISSUE

Disyembre 12, 2018, liwat nagguwa sa publiko si Mercedes kag nagpatawag sang presscon sa diin iya gin-alegar nga ginpameke nanday Councilor Nava ang mga pirma nga nagapamatok sa PECO franchise renewal.

Kada adlaw suno kay Nava, ginabuyayaw siya ni Mercedes pero wala niya ginasapak.

MGA KONTRA NI MERCEDES

Indi matuod suno sa konsehal nga siya lang ang kontra ni Mercedes.

Suno kay Councilor Nava, kun bukaron ang Facebook ni Mercedes, dire makita nga madamo siya sang ginabuyayaw.

Sa pagkamatuod madamo sang libel cases si Mercedes suno sa konsehal.

Ginbuyagyag man sang konsehal nga sang ayuhay pa sila ni Mercedes kag ginakabig pa siya nga pakaisa, madamo sang napasaka nga estafa cases batok dire kag ang konsehal ang nagserbe nga abogado.

GRAND DESIGN

Suno kay Councilor Nava, kun sin-o man ang nag-instigate kag nag-orchestrate sang nagkalatabu, ini ang dapat tutukan sang kapulisan.

Ang isyu sang pagpameke sang pirma kontra PECO, ang paggamit kay Mercedes sa pagpagguwa sang expose kag ang pagpatay kay Mercedes suno sa konsehal, kabahin sang grand design agud matum-ok siya.

Suno sa konsehal, may nagasakay sa isyu agud ma-discredit siya ilabe na nga malapit na ang eleksyon.

Si Councilor Nava ang nagakandidato sa pagka-bise alkalde sa May elections.

Nagdul-ong sang kaha sang softdrinks si Mercedes sa Calahunan kahapon sang ginpalapitan sang riding-in-tandem kag gintiro.

Patay man ang upod ni Mercedes sa front seat nga si Erwin Fontillas.

Wala pa nakilala ang mga suspetsado. (AGB/MO)