NAPOLCOM 6 Director Atty. Joseph Celis, nagpa-athag angut sa hot pursuit operation

Iloilo City – Dapat nga mapamatud-an nga padayon ang police operations agud ma-justify nga gindakup ang suspetsado sa krimen sa hot pursuit operation.

Pa-athag ini ni Atty. Joseph Celis, director sang National Police Commission (Napolcom) 6, angut sa pamangkot sang publiko kon asta diin ang operasyon sang mga pulis agud makabig nga hot pursuit.

Suno kay Celis, kon naaktuhan sang pulis ang krimen kag may ihibalo siya sa identity sang suspek, pwede nga mahimo ang hot pursuit operation.

Legal man ang hot pursuit bisan wala sang ihibalo ang police apang may testigo nga makatindog ukon makahatag sang bulig samtang nagapadayon ang operasyon.

Indi naman makonsiderar ang hot pursuit kon may interruption ukon pag-untat na sa operasyon sang police.

Indi maathag sa Police Operational Procedure suno kay Celis kon dapat nga matapos ang hot pursuit sa specific nga period. Dugang ni Celis, korte ang makadesisyon kon nangin iregular ang pag-aresto sang police sa suspetsado. (JoMaque)