Engkuwentro sa tunga sang Phil. Army kag ginapatihan NPA, nagluntad sa Brgy. Cabatangan, Lambunao; 1 suldado, pilason

Lambunao, Iloilo — Ginabanta sa 20 ka mga miembro sang Baloy Platoon sang Central Front Komiteng Rehiyon Panay ang naka-engkuwentro sang mga katapo sang 61st Infantry Battalion sang Philippine Army sa Barangay Cabatangan, las 5:30 kahapon sang kaagahon, Enero 14.

Sa impormasyon nga nabaton ni PRO 6 spokesperson Supt. Joem Malong, ginapamunuan ni Carl Teodosio alyas Andoy ang grupo nga naka-engkuwentro sang mga suldado.

Napilasan si Corporal Aldrin Cablas.

Ginkarga sa helicopter si Cablas kag gindala sa Calinog District Hospital.

Naglawig sang ginabanta 20 minutos ang engkuwentro suno kay Malong.

Antes ang engkuwentro sa Cabatangan, Lambunao, natabu man ang engkuwentro sa tunga sang mga suldado kag mga rebelde sa Sitio Lay, Brgy Dalije, Miag-ao kahapon, Enero 13.

Sang Enero 11, naka-engkuwentro sang Philippine Army ang mga NPA members sa Sitio Tigmaan, Brgy Alimodias, Miag-ao sa diin nakarecover sang improvised explosive device ukon IED ang mga tropa sang gobierno. (JoMaque)