PECO, maga-operate gihapon bisan ma-expire ang ila franchise sa Enero 19 bangud sang gina-uyatan nga Certificate of Public Convenience and Necessity

Iloilo City— Sa Enero 19, 2019 na magatakop ang prangkisa sang Panay Electric Company (PECO).

Wala pa sang dinahum-dahom sa ila application para sa renewal sang franchise.

Wala pa man sang update sa franchise application sang bag-o nga power player sa siyudad–ang MORE Electric and Power Corp.–nga yara na sa Office of the President matapos nakapasar sa kongreso.

Tubtob subong, Enero 17, wala sang klaro kun ano ang matabu sa pagtapos sang franchise sang PECO bisan ginpasiguro sang Department of Energy nga wala sang power interruption sa siyudad.

Suno kay Engr. Randy Pastolero, Vice President for Operations sang PECO, indi sila mag-untat sa pag-operate tubtob may mandu nga nagapa-untat sa ila.

Ginpahayag ni Pastolero nga maga-operate sila base sa gina-uyatan nila nga Certificate of Public Convenience and Necessity (CPCN) nga magatakop sa Mayo 25 subong nga tuig.

Sang Enero 4 lang suno sa iya, may ginhimo nga hearing ang Energy Regulatory Commission (ERC) sa ila application para sa renewal sang CPCN.

May jurisprudence suno kay Pastolero nga nagapahanugot sa pagpadayon sang pag-operate sang power distribution utility bisan wala sang franchise kag paagi sa CPCN. (AGB/MO)